昨天講Word play，網友Apsara亦講中國人玩字的方法，憶起兒時也很頑皮，喜歡作打油詩、改歌詞。
以下的說話或歌曲，你兒時有沒有講過或唱過？
一句也沒有？噢！你一定太年輕或你的童年不是在香港渡過！
其中一個是我創作的，但坊間有不同版本，可能因為人傳人變種，亦可能因為同時間有其他人也作了類似的東西，大家估一下是那一段文字？
【咀咒。類】ＸＸＸ﹝人名﹞，坐飛機，跌落黎，慘玻璃，
返到屋企唔憤氣，打爛電視機，打爛收音機，「呯linbom林」放臭屁，臭過無比石油氣。
哨牙可以刨西瓜，落雨可以遮下巴，
飲茶可以隔茶渣，劈友可以擋番下。
【數字串連。類】
一落樓梯，二樓仆底，
三個筋斗，四腳朝天，
五塊膠布，六個傷口，
七時入院，八時釘蓋，
九時出殯，十分墟陷。
一加一，二加二，三加三，
死加死，五加皮，六死你，
七個肥婆坐住你，八支槍仔指住你，
九龍醫院唔收你，十個棺財等住你。
【餘音未了。類】
琴日我見到你阿媽跳樓—>扭腰舞！
琴日我偷睇你阿媽沖涼—>茶。
你老豆過左身﹝新﹞—>加坡。
見到你阿媽係廟街做雞—>蛋仔。
你老母臭﹝湊﹞—>大你。
【諧音。類】
55699﹝快快食奶奶﹞
465354709394﹝死佬唔三唔四出呢攪三攪四﹞
2038240﹝伊利沙伯醫死你﹞
1996﹝搵奶奶食﹞
【對聯。類】
幾大就幾大，燒賣就燒賣。
地上執到寶，問天問地欏唔到。
追得到，比個錢你買紅棗。
聲大大，冇野賣。
意見接受，一切照舊。
返工就有心無力，放工即刻精神奕奕。
羸就羸粒糖，輸就輸間廠。
頭髮似堆草，唔駛去飛髮鋪。
著鞋唔著襪，大方兼老實。
講o野一舊舊，似足你老豆。
【改編歌詞。類】
《生日歌》
恭祝你生日撼穿個頭，
慶賀你死埋老豆；
年年都要乞食，
歲歲都要楂兜，
恭喜你，恭喜你。
《神奇大帝》
神奇大帝穿o左個窿，娶o左三位妾氏，
有個放屁，有個痘皮，有個有個就o黎死。
《叮噹》
人人期望嘔白泡，嘔得快就死得早；
人人懸耀開心歡笑，撩到吊鐘反轉更好，
爬進奇妙口袋裏；你想嘔泡必得到，
奇妙嘔法不可思義，心中一想就嘔泡。
想叮噹伴你嘔泡，難過去尋寶。
你睇！嘔出黎啦！
清倉啦！誰都喜歡你，嘔清晒Ｄ泡！
【難以分。類】
死八婆，賣菠蘿，一蚊十二個，冇人要。
大笨象，渣支槍，去打扙，打唔贏，番呢罰佢食碗辣椒醬。
沖完涼，冇褲著，大人細人燒炮杖，問你想唔想當佢兩巴掌？
擋薦牌，排排坐，坐飛機，機械人，人之初，
初老泥，泥猛魚，魚肝油，油麻地，地中海，
海龍王，黃大仙，仙人掌，掌你兩巴掌。
閘住反彈冇回頭
大笨象會跳舞，馬騮仔會上樹；
猴子會打關斗，山邊有個姑娘；
剝衫剝褲沖涼，凸出個PatPat曬太陽。
我兒時作了什麼呢？請按此
，冇落到！
！ 
